Ranchi mein doston ya family ke sath ek poora din bitane ke liye Ormanjhi ka ‘Bhagwan Birsa Biological Park’ (jise log Ranchi Zoo ya Birsa Park kehte hain) sabse badhiya jagah hai. Badi parking, ped-paudhe, janwar aur boating ke karan Sunday ko yahan sabse zyada log aate hain.
Ghar se nikalne se pehle time aur budget ka hisaab lagana zaroori hai. Niche maine Ranchi Zoo ki timings, safari ka rate, aur andar milne wali baaki suvidhaon ki ekdum direct information nikal kar di hai. Isse aapko line mein lag kar rate board padhne ki zaroorat nahi padegi.
Ranchi Zoo Opening & Closing Timings (2026)
Park khulne ka time mausam ke hisaab se badalta hai. Garmi aur thand mein time thoda alag hota hai. Apna time is table se match kar lo:
| Mausam (Season) | Park Khulne Ka Time | Park Band Hone Ka Time |
| Garmi (March se October) | Subah 9:00 Baje | Shaam 5:00 Baje |
| Thand (November se February) | Subah 9:00 Baje | Shaam 4:30 Baje |
| Weekly Off (Chhutti) | Har Monday ko Zoo band rahta hai | – |
Ranchi Zoo Safari Timings Aur Ticket
Birsa Park ke andar paidal chalne ke alawa ek special Bus Safari bhi chalti hai. Ye bus aapko zoo ke main areas ka round lagwati hai, jo bachhon aur bujurgon ke liye sabse sahi hai.
- Safari Bus Start Time: Subah 10:00 Baje.
- Safari Last Bus: Shaam 4:00 Baje.
- Bus Ki Frequency: Har 30 se 45 minute mein ek bus nikalhti hai (bheed par depend karta hai).
- Safari Ticket Rate: ₹30 se ₹50 per person (ye rate gate par entry ticket ke alawa lagta hai).
Agar poora zoo paidal nahi ghumna hai, toh aap battery wali gaadi (Battery Operated Vehicle – BOV) bhi le sakte hain. Inka charge lagbhag ₹50 se ₹100 ke beech hota hai aur ye 45 minute mein poora park ghuma deti hain.
Ranchi Zoo Ticket Price (Entry Fee)
Zoo ke main gate par jo entry ticket lagta hai, uska rate pichle kuch waqt se fix hai. Kharcha is table mein dekh lo:
| Age Group / Category | Entry Ticket Price |
| Adults (12 saal se upar) | ₹40 per person |
| Bachhe (3 se 12 saal) | ₹20 per person |
| 3 Saal se chote bachhe | Bilkul Free |
| Still Camera (Photo) | ₹50 extra |
| Video Camera | ₹250 extra |
Machhli Ghar (Aquarium) Aur Boating Ka Kharcha
Ranchi Zoo ke theek samne (highway ke dusri taraf) Jharkhand ka sabse bada fresh-water Aquarium bana hua hai. Zoo ke sath-sath log isko bhi dekhna pasand karte hain.
- Aquarium Entry Ticket: Adults ke liye ₹30 aur bachhon ke liye ₹15.
- Khulne Ka Time: Subah 9:30 baje se shaam 5:00 baje tak (Monday band).
Boating Detail:
Zoo ke andar ek badi si lake hai jahan pedal boating hoti hai.
- Boating Rate: 4-seater pedal boat ke liye lagbhag ₹100 (30 minute ke liye).
- Ticket andar lake ke paas bane counter se hi lena padta hai.
Parking Fees
Agar aap apni gaadi se jaa rahe hain, toh zoo ke bahar ek kafi bada parking area hai. Sarkar ka official parking charge is tarah se hai:
- Cycle: ₹5
- 2-Wheeler (Bike/Scooty): ₹10
- 4-Wheeler (Car/SUV): ₹30
- Bus/Mini Bus: ₹50
Park Ke Andar Ke Sakht Niyam (Strict Rules)
Zoo mein entry karne se pehle security guard aapki poori checking karte hain. In baaton ka poora dhyan rakhna:
- Plastic Ban: Andar single-use plastic bilkul mana hai. Agar aap paani ki plastic bottle (Kinley, Bisleri) andar le ja rahe hain, toh gate par aapko security money (deposit) dena padta hai aur bottle par sticker lagta hai. Wapas aate waqt bottle dikhane par paisa wapas mil jata hai.
- Khana-Peena: Aap ghar se bana hua khana andar le ja sakte hain. Andar park aur benches bane hain jahan family ke sath baith kar khana kha sakte hain. Lekin khana janwaro ko fek kar dena sakt mana hai.
- Paltu Janwar (Pets): Apne kutto ya billiyo ko park ke andar le jana allowed nahi hai.
- Fine: Kisi janwar ko chhedne, patthar marne ya enclosure phandne par ₹1,000 se upar ka fine aur police action ho sakta hai.
Ranchi City Se Ormanjhi Zoo Kaise Pahuchein?
Birsa Park Ranchi city se thoda bahar (Ranchi-Patna Highway – NH 33) par hai.
- Ranchi Railway Station se Door: Lagbhag 20 Kilometer.
- Khadgarha Bus Stand se Door: Lagbhag 18 Kilometer.
- Kaise Jayein: Kantatoli chowk ya Booty More se auto aur bus continuously milti rahti hain. Booty more se share auto mein 20-30 rupaye mein direct zoo ke gate par pahuch sakte hain.
Sunday aur chhutti ke din yahan bhari bheed milti hai. Agar shanti se ghumna hai aur sabhi janwaro ko aaram se dekhna hai, toh koshish karein subah 10 baje tak zoo ke andar entry le lein.
Frequently Asked Questions (FAQs)
Q1. Ranchi Zoo hafte mein kis din band rahta hai?
Ans: Ranchi Zoo (Birsa Munda Jaivik Udyan) saaf-safai aur janwaro ke aaram ke liye har Somwar (Monday) ko poori tarah band rahta hai.
Q2. Kya Ranchi zoo mein bahar se apna khana le ja sakte hain?
Ans: Haan, aap ghar ka khana tiffin box mein pack karke andar le ja sakte hain. Lekin chips ke packet ya plastic polythene andar le jana sakht mana hai.
Q3. Birsa park mein bus safari ka alag se ticket lagta hai kya?
Ans: Haan. Gate par lagne wale main entry ticket (40 rupaye) ke alawa, andar chalne wali safari bus ya battery car ka charge alag se (30 se 50 rupaye) dena padta hai.
Q4. Ranchi station se Ormanjhi Zoo ki doori kitni hai?
Ans: Ranchi main railway station se zoo ki doori lagbhag 20 kilometer hai. Station se Kantatoli ya Booty More aakar wahan se direct auto mil jata hai.
Q5. Machhli ghar (Aquarium) dekhne ke liye kitna paisa lagta hai?
Ans: Zoo ke samne bane aquarium ki entry fee badi umar ke logon ke liye 30 rupaye aur chote bachhon ke liye 15 rupaye hai. Ise ghumne mein 40-50 minute lagte hain
